Wo jo ramuz-e-ishq hai, kon samajh saka, ke yun
     Nakhun-e-uql say kabhi uqda nahin khhula, ke yun

Maana ke muslehat thhee kuchh tum nay ugur kaha, ke yun
     Waqt karay ga faisla yun durust thha, ke yun

Upnee khata hai bus yehi, hum nay munafqat na ki
     Jo bhee humaray dil thha keh diya burmala, ke yun

Tu ne to loh-e-fikr say mazee khurach diya tamaam
     Main bhee tujhay bhula sakoon, koi amal bata, ke yun

Main ne kaha ke bin tere kaisay katay gee zindagi
     Jultay huway chiragh ko usnay bujha diya, ke yun

Pursish-e-hal-e-dil pe jab hum na jawab de sakay
     Chehra zabaan ban gaya, sab ne samajh liya, ke yun

Tum pe kiya jo aitmad upna yehi qasoor thha
     Is say ziyada aur ab tum se kahain to kya, ke yun

Sharh-e-nishat-e-wasl pe donon ka khul gaya bharam
     Main ne usay kaha ke yun, us ne mujhay kaha ke yun

Pehlay na hum samajh sakay, log banay thhay dost kyon
     Waqt wo jab guzar gaya, phir ye pata chala, ke yun

Jaanna chahtay thhay hum, logon ki wajh-e-be-hisee
     Khud hee jawab mil gaya, dekha jo aa'ina, ke yun

Zo'm-e-khudaee thha jinhain, un ko kiya thha gharq-e-aab
    Aaj ke zalimon ka bhee hashar hamain dikha, ke yun

                                              Murtaza Birlas
                                             (Girah-e-Neembaaz)
Home
Copyright (C) Reserved by Author
Index of Girah-e-Neembaaz
Print/Download in PDF
Download Free Acrobat Reader (R)  for Reading PDF Files